Presentamos reclamación contra a subida do imposto de "plusvalías"

Esta Asociación, ante a Modificación da ordenanza fiscal reguladora do imposto sobre o incremento de valor dos terreos de natureza urbana -antigamente denominado "plusvalías"-, aprobada provisionalmente polo Concello de Nigrán, na sesión ordinaria do pleno celebrada o 28-10-2025, e publicado o anuncio de exposición ao público no Boletín Oficial da Provincia de Pontevedra do 03-11-2025, de conformidade coa Lei, ven de presentar unha reclamación, solicitando que non se aprobe definitivamente polo pleno do Concello de Nigrán a Modificación da ordenanza fiscal reguladora do imposto tal como están redactados os artigos 14º das bonificacións e 13º da cota tributaria, e sexan substituídos polas seguintes redaccións:

Artigo 13.-

A cota íntegra deste imposto será o resultado de aplicar á base impoñible o tipo do 15 %.

A cota liquida do imposto será o resultado de aplicar sobre a cota íntegra, no seu caso, a bonificación a que se refire o artigo seguinte.

Artigo 14.-

Aplicarase unha bonificación do 95 % aos suxeitos pasivos na cota integra resultante do imposto na transmisión de terreos e na transmisión ou constitución dos dereitos reais de goce limitativos do dominio cando sexan realizados a título lucrativo por causa de morte a favor do cónxuxe, descendentes e ascendentes, por natureza ou adopción. Tamén se aplicará esta bonificación ás herdanzas en vida, de pactos de mellora e apartacións. Aos efectos de acollerse a esta bonificación, equiparase ao cónxuxe a quen convivise co causante con análoga relación de afectividade e o acredite mediante certificado de inscrición no rexistro de unións de parellas de feito expedido para o efecto.

Reclamamos novamente medidas para evitar accidentes de tráfico nas estradas de Chandebrito e das Laxes

Esta Asociación ven de presentar solicitude dirixida ao Concello de Nigrán na que se indica:

Que se reciben habitualmente queixas da veciñanza polo perigo que supón a velocidade excesiva á que circulan numerosos vehículos polas Rúas de Chandebrito e das Laxes, ambas na parroquia de Chandebrito e limitadas a 40 e a 30 Kms./h, respectivamente.

Esta situación, que xa se trasladou hai tempo e por escrito ao Concello de Nigrán, é especialmente grave arredor das 9:00, 15:30 e 17:00 horas, de gran afluencia de vehículos nestes viais con motivo dos horarios de funcionamento do Colexio Estudio.  (...) 

Polo exposto, solicita novamente, que se adopten as medidas oportunas co fin de evitar o grave risco de accidentes de tráfico e atropelos de peóns que circulan polas estradas citadas anteriormente. 

Por elo, esta Agrupación veciñal propón as seguintes: 

- Vixilancia pola policía local nos horarios indicados, especialmente entre as 16:30 e as 18:00 horas.

- Contrución de pasos elevados na contorna dos núm. 9 e 29 da Rúa das Laxes, e dos núm. 7, 11 e 23 da Rúa de Chandebrito (lugares con alto risco de accidente), coa súa correspondente sinalización vial vertical e horizontal.

 

Fotografía na que se observa o caos de tráfico na contorna da confluencia das rúas de Chandebrito e das Laxes, limitadas a 40 e a 30 Kms./hora

Visita da Cooperativa Casa das Redes

A Cooperativa A Casa das Redes, promotora do grupo de xóvenes da comarca O Febeiral visitou a Asociación Chandebrito 1807 o sábado día 6 ás 13:30 horas. «A idea desta iniciativa era crear un espazo común para a xente nova», explican. Un dos seus primeiros proxectos foi crear un mapeo colectivo das entidades sociais, culturais e artísticas que hai no Val Miñor e, este sábado,  divulgárono cunha ruta en autobús que visitou unha boa parte das iniciativas que descubriron.

Así, membros directivos da Asociación Chandebrito 1807 explicaron as actividades que esta leva a cabo e os obxectivos pretendidos, especialmente a colaboración con entidades privadas e públicas e a protección e posta en valor do patrimonio natural e cultural, tanto material como inmaterial.

O vindeiro domingo dia 21 de decembro, esta Agrupación estará presente na Praza do Concello de Baiona, na Feira Social e Artística do grupo de xente nova do Val Miñor Febeiral do Miñor.

Incumprimento do contrato das luces de nadal en Chandebrito

Esta Agrupación Veciñal quere denunciar públicamente o incumprimento do contrato de subministración da iluminación do Nadal 2025-2026 na parroquia de Chandebrito.

Según o anexo de localización de elementos do prego de prescricións  técnicas na parroquia de Chandebrito figura un elemento luminoso 3D de dimensións de 5 metros de altura con forma de estrela no Castro de Chandebrito e tamén un motivo luminoso na fachada da igrexa parroquial.

Como puido comprobarse por parte desta Asociación, estes dous elementos foron instalados no día de hoxe, venres 5, poucas horas antes do acto de encendido anunciado para as 19 horas. Ademais, a estrela contemplada para o Castro foi cambiada por dúas estrelas planas que aínda estando xuntas miden moito menos de 5 metros de altura, aparte de estar colocadas tan baixas que tan só se observa a figura superior desde o núcleo de poboación da Igrexa.

Tamén advírtese da realización de cambios na ubicación dos arcos de luces nalgunha rúa sen estar contemplado no prego e que deixaron resíduos de diversos elementos da instalación sen recoller na cume do Castro.

Este feito é un incumprimento claro do contrato porque o artigo 7 do prego de prescricións técnicas contempla que toda a instalación quede finalizada, lista e comprobada no último fin de semana de novembro.

O contrato do alumeado de nadal deste ano foi adxudicado por decreto do alcalde o 20-08-2025 a Isabel Alfonso Vázquez (nome comercial ALVAZ)  por un importe de 80.465 € a proposta da mesa de contratación.

O feito que esta empresa incumprise o calendario da instalación e elementos contemplado do prego de prescrición técnicas tendo en conta o alto importe do contrato fai dubidar se por parte da mesa de contratación se propuxo escoller a mellor oferta e máis aínda se hai a posibilidade de renovarlle automaticamente o contrato para o vindeiro ano.

Obradoiro de doces artesáns de nadal

O vindeiro luns dia 22 de decembro, en horario de  16:30 a 20:00 h. (aprox.), a Asociación Chandebrito 1807 desenvolverá na antiga escola infantil da parroquia (Rúa da Igrexa núm. 2, Chan de Brito) un Obradoiro de doces artesáns de nadal, cunha duración aproximada de tres horas e media.

Para elo, realizaranse varios produtos: mazapáns de améndoa e pataca, 2 turróns (duro e trufa/ chocolate branco, tronco navideño recheio de caramelo salgado e miso (un toque exótico, umami e diferente), e panettone express / roscón de reis 350 gr.

Todo inclúe recetario impreso, envoltorio e caixiña para levar as elaboracións.

Tan só é necesario que as persoas asistentes leven algúns brics ou moldes para os turróns.

(De regalo vai un paquetiño de galletas Linz, típicas destas datas en Austria e Alemania. Inclúe recetario).

Este taller, organizado por esta Asociación, impartirase, ao igual que en anos anteriores, por unha especialista na materia, Sonia de "Reishi Terapia".

Os gastos son 35 euros por persoa, que inclúen todo o material.

O obxectivo é promover un consumo máis responsable, unha alimentación máis sán, elaborando doces de xeito sinxelo, rápido e natural, e camiño á autosuficiencia.

Pódense realizar as inscricións enviando un correo-e a chandebrito1807@gmail.com cos nomes e apelidos, enderezo de correo-e, núm. de teléfono de contacto, idade, zona de residencia.

As peticións de inscrición realizaranse antes do venres dia 19 de decembro ás 14:00 h., reservándose a praza por orde de recepción das mesmas, ata un aforo máximo de 10 persoas.

Máis info. no tlf. 633363183 ou en www.chandebrito1807.blogspot.com  

Esta Asociación pide que se remunicipalice a limpeza viaria e de praias Considera que co novo contrato a tarifa do lixo chegará aos 160 €

 

Esta Asociación, ante as informacións de irregularidades detectadas no proceso de licitación da contratación do Servizo de recollida de residuos urbanos, limpeza viaria e de praias, tanto ao longo da tramitación nos dous últimos anos, que foi paralizado varias veces polos tribunais, como recentemente, tal como denunciou a mesa de contratación, por un posible trato de favor por parte dun concelleiro co apoio do alcalde a unha das empresas concursantes, pide que se deteña inmediatamente a contratación.

Dada a complexidade do prego de contratación, que pode levar no futuro a incumprimentos da empresa adxudicataria como se está dando co actual servizo, esta Asociación considera que o goberno municipal debe rectificar, paralizando a actual licitación e comezar de cero cun novo prantexamento que leve a elaboración dun novo prego de contratación máis sinxelo que se estableza só para o servizo de recollida de residuos urbanos e remunicipalizar os traballos de limpeza viaria e de praias, limitados estes a uns poucos meses do ano e que pode facer perfectamente o Concello sen costes tan elevados.

O megacontrato de recollida do lixo licitado de chegar a aprobarse polo pleno municipal debido a un interese sospeitoso do goberno municipal pode ser desastroso para as arcas municipais e será en detrimento de cubrir melloras en servizos necesarios e infraestruturas. Un gasto fixo de mais de tres millóns de euros ao ano por un período de dez anos ademais de ser carga pesada para a elaboración dos orzamentos anuais implicará un incremento na taxa de recollida de lixo motivado pola obriga normativa da Unión Europea de repercutir todos os custes do servizo, neste caso dun mal contrato, na tarifa a pagar, co cal pode pasarse no caso das vivendas de 78 € anuais a uns 160 € como mínimo. Isto, engadido a suba do IBI do 20 % desde o 2024, situaría ao Concello de Nigrán como un dos maiores de carga impositiva.

Reclamación contra a taxa de documentos administrativos

Esta Asociación presentou no Rexistro do Concello de Nigrán un escrito de Reclamación á Modificación da ordenanza fiscal reguladora da taxa pola expedición de documentos administrativos, aprobada provisionalmente polo pleno municipal o 29.07.2025.

Na modificación desta ordenanza fiscal inclúese de forma inadecuada unha tarifa de 23 € pola entrega de cada placa de Vado permanente como si de un documento máis calquera se tratase.

Pretende o alcalde para aprobar esta modificación argumentar que se trata de restablecer unha taxa que xa existía na Ordenanza fiscal reguladora da taxa por entrada de vehículos a través de beirarrúas, ordenanza derrogada desde o ano 2018. Argumentación falsa porque nela contemplábase que as placas de vado permanente, cando se solicitaban por primeira vez, e nos casos de entradas a través de beirarrúas, se entregaban de forma gratuíta, mentres que na proposta de modificación en todos os casos será abonando 23 €.

Carece de sentido incluír a entrega das placas de vado permanente na ordenanza de expedición de documentos administrativos sen aportar unhas normas de xestión que regulen a concesión das licenzas de vados permanentes que debería facerse cunha ordenanza específica que regulase ditas licenzas.

Despois de oito anos seguidos sen cobrar pola entrega das placas de vado permanente pretender facelo agora e de forma incorrecta queda claro que só é cunha finalidade recaudatoria nun concello que desde o ano 2024 está aplicando unha suba do 20% no recibo do Imposto de Bens Inmobles (IBI).

Por todos este motivos, esta Agrupación solicita ao pleno municipal que non aprobe a Modificación da Ordenanza de expedición de documentos administrativos nos termos que se aprobou provisionalmente.

Convocatoria de obradoiro de cestería en vimbio (III)

Esta Agrupación convoca a actividade seguinte:

Obradoiro de cestería en vimbio - Chan de Brito (III), de 20 horas:

- Lugar de celebración: Antiga escola infantil de Chan de Brito (Rúa da Igrexa, 2 - Chan de Brito, C.P. 36360 Nigrán)

- Datas: desde o sábado 25 de outubro ata o 27 de decembro (ambos incluidos), durante oito sábados consecutivos (agás o 1 de novembro e 6 de decembro).

- Horario: de 16:30 a 19:00 h (2,5 horas). 

- Mestre: Suso Crespo de Tui, con ampla experiencia na materia.

- Número de participantes: mínimo de 6 e máximo de 10 por aula.

- Custo: 30 euros mensuais por persoa, a abonar o primeiro día de cada mes do curso (de necesitar material, pagarase aparte na propia aula).

- Criterio de selección: por rigorosa orde de petición de inscrición.

- Inscrición e info.: Enviar correo-e entre o 13 e o 23 de outubro (incluidos) ao enderezo chandebrito1807@gmail.com indicando nome, apelidos, tlf. de contacto.

- De renunciar á participación nesta actividade, rógase que o comuniquen antes do dia de comezo. Do contrario, excluiríase en próximas actividades desta Agrupación.

Apoiamos as peticións da veciñanza para a limpeza do monte lindeiro ás vivendas

Esta Asociación apoia as peticións da veciñanza da parroquia para que se fagan xestións de limpeza do monte veciñal lindeiro coas vivendas, co fin de evitar danos a estas no caso de producirse lumes forestais.

En vista de que a Xunta Rectora da Comunidade de Montes non resposta os escritos presentados hai varios meses para realizar as tarefas de mantemento do monte próximo ás casas, dirixiuse solicitude á Xunta de Galicia para requerirllo, e asi mesmo, o pasado dia 9 de xullo presentouse solicitude ao Concello de Nigrán indicando o seguinte:

O 13.05.2025 entregouse escrito por parte da veciñanza á Comunidade de Montes de Chandebrito pedindo a roza e limpeza do monte desa Comunidade lindeiro ás vivendas.

A dia de hoxe, o único que se limpou foron unhas pequenas faixas do referido monte na contorna das vivendas nº 4 e 6, pero por parte dos propietarios destas.

Esta situación é vista con moita preocupación pola veciñanza desta parroquia, que sufriu as devastadoras e nefastas consecuencias dos lumes forestais, entre outras ocasións, o 15 de outubro de 2017, provocando o falecemento de dúas veciñas do lugar, a queima de dúas vivendas, un autobús, e cando menos dous turismos na mesma zona, ademáis de cuantiosos danos materiais.

O escrito entregado por correo certificado á mencionada Comunidade dí literalmente:

“En vista do deficiente estado de conservación do monte veciñal en man común de Chandebrito, de propiedade desta Comunidade de Montes, e de conformidade ao establecido na vixente Lei 3/2007 de prevención e defensa contra incendios forestais de Galicia, diríxome a Vde. e

Solicítolle que faga as xestións necesarias para realizar as pertinentes tarefas de roza e limpeza do referido monte (no lugar “da Rega”, na parte superior dos inmobles nº 2 a 6 do Camiño da Igrexa; e demáis zonas da parroquia que así o necesiten), creando unha faixa de seguridade de 50 metros de distancia ás vivendas lindeiras con este monte que evite danos e prexuízos graves á veciñanza e ás mencionadas no caso de lumes forestais.

No caso de que chegado o vindeiro 31 de maio, non se executaran os traballos de roza e limpeza sinalados, darase traslado ao organismo competente da Xunta de Galicia para a adopción das medidas necesarias.”

Por elo, e co fin de evitar danos irreparables á veciñanza e aos bens do lugar,  SOLICITA que se requira de urxencia á Comunidade de Montes Veciñais en Man Común de Chandebrito para a realización das tarefas necesarias de roza e limpeza dos terreos da súa titularidade lindeiros ás vivendas nunha faixa de 50 metros, con referencias catastrais 54035A00900001, 54035A00700042, entre outras.

Solicitamos a limpeza de camiños municipais nos que o Concello nunca actuou

En setembro de 2021 o Concello de Nigrán aprobou o actual inventario de vías municipais, aprobado definitivamente o 28.03.2022. Este documento contempla 22 camiños inventariados na parroquia de Chandebrito, dos cales 14 foron incorporados nesas datas.

En varios destes últimos o Concello non realizou polo momento ningún traballo de mantemento e conservación, como os camiños do Soeido, de Cordiñas e das Pereiras (barrio da Igrexa), e o das Vesadas do Río (As Rozadas). 

De conformidade ao establecido no artigo 25.2 d) e 26.1 a) da Lei 7/1985 reguladora das Bases de Réxime Local, que atribúe aos concellos o execicio en todo caso como competencias propias en materia de infraestrutura viaria e outros equipamientos da súa titularidade, e a obrigatoriedade de prestar os servizos de limpeza dos viais públicos, respectivamente,

Esta Asociación, apoiando as demandas da veciñanza, ven de solicitar por escrito ao Concello de Nigrán que proceda a realizar á maior brevidade posible os traballos de mantemento e conservación dos camiños do Soeido, de Cordiñas e das Pereiras (sitos no barrio da Igrexa), e o das Vesadas do Río (As Rozadas), especialmente a roza e limpeza da superficie e marxes dos mesmos, xa que se atopan en mal estado de conservación, causando molestias, danos e prexuízos aos peóns que circulan por eles.

Camiño das Vesadas do Río

Solicitamos a mellora do Camiño das Pereiras e da antiga escola de Chan de Brito

Esta Asociación, recibiu nos últimos meses peticións da veciñanza de arranxo e melloras nos seguintes bens inmobles localizados na parroquia de Chandebrito de titularidade municipal:

- Mellora do Camiño das Pereiras á altura do núm. 2: recheo de focha na parte alta do vial 

- Mantemento e reparacións na parcela da antiga escola infantil sita na Rúa da Igrexa núm. 2: Roza, limpeza, arranxo de xogos infantís, reparación do peche e cancela, arranxo da planta baixa, etc.

Por elo, esta Agrupación ven de presentar no rexistro municipal de Nigrán memoria valorada xa entregada o 09/12/2020 e sen resposta despois de transcorrer máis de catro anos, solicitando a execución das actuacións citadas anteriormente para a mellora do Camiño das Pereiras e de mantemento e reparación da antiga escola infantil, ao atoparse ambos nun deficiente estado de conservación e ser de competencia municipal.

A Asociación solicita a mellora de varios viais na parroquia

A Rúa da Barreira (sito no barrio de Pracíns, da parroquia de Chandebrito), conta cun pavimento asfáltico desde o ano 1998 no que se practicaron calas para dotar á zona da rede xeral de sumidoiros, ademáis de existir raíces de arborado que afectan á calzada, polo que a capa de rodadura desta vía municipal atópase moi deteriorado, co conseguinte risco de danos e prexuízos a vehículos e peóns que circulan pola mesma.

Igualmente, a superficie do vial Rúa da Igrexa, nesta mesma parroquia, á altura do inmoble número 2 (de titularidade municipal), e do camiño de baixada ao torreiro vello da festa e á igrexa parroquial, na mesma zona, atópanse nun mal estado de conservación e causando un impacto visual nun lugar que conta con importantes valores históricos e etnográficos pola existencia de diversos elementos do patrimonio cultural e de edificacións tradicionais. 

Tamén consideramos necesaria a instalación dun valo metálico á altura do núm. 5 da Rúa da Igrexa, que se atopa nun plano moi inferior, para evitar caídas, adecuando o marxe do vial ata o valo. 

Vistos os artigos 25 e 26 da Lei 7/1985, solicitouse a realización das obras de dotación de nova capa de asfalto en toda o vial municipal denominado Rúa da Barreira, na Rúa da Igrexa á altura do núm. 4 e de adecuación do Camiño de baixada á igrexa parroquial, e da marxe da rúa da Igrexa núm. 5, en Chandebrito, de conformidade ao exposto anteriormente.

Obradoiro de cestería tradicional con vime (II)

 Esta Agrupación convoca un novo obradoiro de cestería tradicional con vimbio en Chan de Brito (II), de 20 horas:

- Lugar de celebración: Antiga escola infantil de Chan de Brito (Rúa da Igrexa, 2 - Chan de Brito, C.P. 36360 Nigrán) Ubicación: https://maps.app.goo.gl/3pjyQRUXqFmeCgTa7 

- Datas: desde o sábado 8 de marzo ata o 3 de maio (ambos incluidos), durante oito sábados consecutivos (agás o 26 de abril).

- Horario: de 16:30 a 19:00 h (2,5 horas).

- Prezo: 30 euros ao mes por persoa, a abonar o primeiro dia de cada mes (de necesitar material pagaráse aparte na propia aula)

De renunciar á participación nesta actividade, rógase que o comuniquen antes do dia do comezo. Do contrario, excluiríase en próximas actividades desta Agrupación.

Convócase unha nova edición do obradoiro de cestería tradicional para este ano

Esta Asociación convoca para este ano unha nova edición do Obradoiro de cestería tradicional con vimbio en Chan de Brito, de 20 horas:

- Lugar de celebración: Antiga escola infantil de Chan de Brito (Rúa da Igrexa, 2 - Chan de Brito, C.P. 36360 Nigrán)  Ubicación: https://maps.app.goo.gl/3pjyQRUXqFmeCgTa7 

- Datas: desde o sábado 8 de marzo ata o 3 de maio (ambos incluidos), durante oito sábados consecutivos (agás o 26 de abril).

- Horario: de 16:30 a 19:00 h (2,5 horas).

- Prezo: 30 euros ao mes por persoa, a abonar o primeiro dia de cada mes (de necesitar material pagaráse aparte na propia aula)

De renunciar á participación nesta actividade, rógase que o comuniquen antes do dia do comezo. Do contrario, excluiríase en próximas actividades desta Agrupación.