Reclamamos a inclusión nos Orzamentos dunha partida para obras de mellora da antiga escola

Ante o acordo de aprobación inicial polo Concello de Nigrán do Orzamento Xeral para o ano 2026 na sesión ordinaria do pleno celebrada o 03.03.2026, publicado no BOP do 05.03.2026, esta Asociación ven de presentar reclamación ao mesmo xa que no citado Orzamento non se recolle partida presupostaria algunha para o arranxo e mellora da antiga escola infantil de Chandebrito, un inmoble de titularidade municipal desde o ano 1960 usado desde o 2011 por dúas Asociacións desta parroquia que desenvolven actividades abertas a tódalas persoas.

Neste ben non se executaron obras de conservación, mantemento ou reparación como mínimo desde hai uns 20 anos, polo que se atopa nun deficiente estado de conservación, especialmente o parque infantil (con xogos que causan risco de danos e prezuízos para usuarios); bancos enterrados; papeleiras esnaquizadas; parcela forestal moi descoidada (con abundante matogueira que provoca risco de danos graves no caso de lume forestal); tellado estragado en edificación anexa (con desprendementos de tellas que poden causar danos ás persoas en caso de ventos fortes); piso de corcho moi deteriorado e levantado (provocando tropezóns); carencia de rodapés; pintura das paredes interiores e entre as dobres fiestras en moi mal estado e con suciedade; mobiliario moi estragado (mesas, armario e outros); carencia de aseos no baixo; xuntas da soleira de pedra no exterior da parte superior da edificación sen tomar con cemento (motivando que as herbas medren a carón do inmoble); valos coa pintura estragada; partes metálicas oxidadas; cancela de acceso ao parque estragada e tirada; peche de finca con aramado moi deteriorado (provocando risco de caídas desde varios metros de altura sobre a vía pública); etc.

Este mal estado de conservación provoca risco de danos e prexuízos a todas as persoas usuarias, polo que esta Asociación presentou diversas solicitudes no rexistro do concello de Nigrán para que se adoptaran medidas dirixidas a frear o deterioro deste inmoble, solucionar as eivas sinaladas, garantindo a seguridade, salubridade e accesibilidade, e así tratar de evitar os riscos para a poboación. Estas solicitudes, presentadas no rexistro municipal en novembro de 2015, maio de 2016, o 07.02.2017, o 09.12.2020 (xunto cunha memoria valorada), e o 27.05.2025, entre outras, non foron atendidas polo momento.

A principios deste ano, volvéuselle solicitar directamente a mellora deste ben ao Sr. Alcalde, respostando este que o goberno estaba traballando nos orzamentos deste exercicio, e que se contemplaría a dotación necesaria para atender este asunto, que el consideraba necesario, polo que adquiriu unha obriga ao respecto.

Trátase do único inmoble do Concello de Nigrán na parroquia de Chandebrito que pode ser obxecto de uso por parte da administración como local electoral nas eleccións europeas, xerais, autonómicas e local. De feito, utilízase para tal fin desde o ano 1979.

Ademáis, é un inmoble cun importante valor histórico e etnográfico para a veciñanza e a vida da citada parroquia, construido no ano 1918 e con actividade educativa pública documentada desde o ano 1923 (máis información en https://dialnet.unirioja.es/descarga/articulo/9464346.pdf ), que se atopa formando parte e na contorna dun conxunto de bens inventariados do patrimonio cultural (igrexa parroquial, reitoral, palco e torreiro da festa).

Por elo, solicitouse ao Concello de Nigrán que non se aprobe definitivamente polo pleno o Orzamento Xeral para o exercicio 2026 tal e como se atopa, e se recolla unha partida orzamentaria para o arranxo e mellora da antiga escola infantil de Chandebrito, de titularidade municipal, polos motivos expostos.

Modificación de datas das xornadas formativas gratuítas sobre Internet

 

A Asociación Chandebrito 1807 volve convocar, a través do Centro de Iniciativas Profesionales, trasladando para os vindeiros meses de abril e maio, dúas xornadas formativas gratuítas relacionadas con búsquedas e trámites coa Administración a través de Internet:

- A primeira, baixo a denominación "Como buscar contidos culturais e de lecer en internet" terá lugar os dias venres 10, luns 13 e venres 17 de abril, de 17:00 a 20:00 horas.

- A segunda, titulada "Trámites máis comúns coa Seguridade Social", desenvolverase os dias luns 4, venres 8 e luns 11 de maio, de 17 a 20 h.

Ambas accións realizaranse na antiga escola infantil de Chandebrito (Camiño da Igrexa nº 2) e son gratuítas.

As inscricións faranse enviando: nome, apelidos, lugar de residencia e núm. de teléfono de contacto ao enderezo chandebrito1807@gmail.com ata o 31 de marzo e 24 de abril.

Presencia na Festa da Arribada en Baiona o 28 de febreiro e o 1 de marzo

 

Posto en Baiona, no ano 2025

A Asociación Chandebrito vai colaborar novamente coa Cooperativa A Casa das Redes, promotora do grupo de xóvenes da comarca O Febeiral, nesta ocasión o sábado dia 28 de febreiro e o domingo 1 de marzo, con motivo da celebración da Festa da Arribada en Baiona.

Membros directivos desta Asociación explicarán, no posto reservado ás entidades sociais, as actividades que esta leva a cabo e os obxectivos pretendidos, especialmente a colaboración con entidades públicas e privadas e a protección e posta en valor do patrimonio natural e cultural.

Por outra banda, tamén falarán da historia da parroquia de Chandebrito.

Xornadas formativas sobre Internet

A Asociación Chandebrito 1807 organiza, a través do Centro de Iniciativas Profesionales, para os vindeiros meses de marzo e abril dúas xornadas formativas relacionadas con búsquedas e trámites coa Administración a través de Internet:

- A primeira, baixo a denominación "Como buscar contidos culturais e de lecer en internet" terá lugar os dias 16, 20 e 23 de marzo, de 17:00 a 20:00 horas.

- A segunda, titulada "Trámites máis comúns coa Seguridade Social", desenvolverase os dias 10, 13 e 17 de abril no mesmo horario de 17 a 20 h.

Ambas accións realizaranse na antiga escola infantil de Chandebrito (Camiño da Igrexa nº 2) e son gratuítas.

As inscricións faranse enviando: nome, apelidos, lugar de residencia e núm. de teléfono de contacto ao enderezo chandebrito1807@gmail.com ata o 5 de marzo.

Solicitamos a reparación da Estrada da Lapela e da Rúa das Tomadas

Esta Agrupación recibiu diversas queixas da veciñanza da zona en relación ao mal estado de conservación dos viais municipais da parroquia de Chandebrito denominados Estrada da Lapela e Rúa das Tomadas. 

En diversos tramos do primeiro deles, as augas pluviais atravesan a calzada dun lado a outro, provocando que a capa de asfalto esté moi deteriorada. 

No caso da segunda existe un tramo estreito con tuberías de auga esnaquizadas e á intemperie. 

Todo elo causa importantes danos en vehículos e situacións de risco de accidentes de tráfico, polo que se roga ao Concello de Nigrán as actuacións necesarias nas citadas zonas á maior brevidade posible. 

Por iso, esta Asociación acaba de solicitar á citada administración a execución das seguintes obras de reparación de viais municipais situados en Chandebrito: 

- Estrada da Lapela, entre acceso ao castro e o límite con Valadares (Vigo): Reparación sub-base e reposición de asfaltado estragado, e limpeza, retirada de terras e entullos das cunetas e marxes da vía. 

- Rúa das Tomadas, entre as vivendas núm. 15 e 19: Reposición de tuberías de auga estragadas, execución de sub-base e dotación de pavimento de aglomerado asfáltico.

Convocatoria de obradoiro de cestería práctica en vimbio (1/26)

Esta Agrupación convoca a actividade seguinte:

Obradoiro de cestería práctica en vimbio - Chan de Brito (I-26), de 20 horas:

- Lugar de celebración: Antiga escola infantil de Chan de Brito (Rúa da Igrexa, 2 - Chan de Brito, C.P. 36360 Nigrán)

- Datas: desde o sábado 7 de marzo ata o 2 de maio (ambos incluidos), durante oito sábados consecutivos (agás o 4 de abril -semana santa-).

- Horario: de 16:30 a 19:00 h (2,5 horas). 

- Mestre: Suso Crespo de Tui, con ampla experiencia na materia.

- Número de participantes: mínimo de 6 e máximo de 10 por aula.

- Custo: 30 euros mensuais por persoa, a abonar o primeiro día de cada mes do curso (de necesitar material, pagarase aparte na propia aula).

- Criterio de selección: por rigorosa orde de petición de inscrición.

- Inscrición e info.: Enviar correo-e entre o 16 de febreiro e o 2 de marzo (incluidos) ao enderezo chandebrito1807@gmail.com indicando nome e apelidos, lugar de residencia e núm. de tlf. de contacto.

- De renunciar á participación nesta actividade, rógase que o comuniquen antes do dia de comezo. Do contrario, excluiríase en próximas actividades desta Agrupación.

Pedimos paralizar e anular a licitación do contrato de recollida de lixo

A ASOCIACIÓN “CHANDEBRITO 1807” PIDE PARALIZAR E ANULAR A LICITACIÓN DO CONTRATO DE RECOLLIDA DE LIXO. 

Tamén denuncia que se anuncie como NON PÚBLICO o acto da apertura dos sobres das ofertas económicas 

A Asociación Veciñal e Cultural Chandebrito 1807 quere denunciar publicamente que no Perfil do contratante dos Contratos públicos de Galicia figura a convocatoria dunha reunión da mesa de contratación para o novo Servizo de recollida de residuos urbanos, limpeza viaria e de praias para o próximo xoves día 12 ás 12:30 horas como un acto NON PÚBLICO no departamento de contratación para a apertura do sobre C correspondente ás ofertas económicas presentadas polos licitadores, cando o estipulado no prego das cláusulas administrativas da contratación na páxina 45 se estipula que o acto será PÚBLICO, ademais se debería celebrar no salón de plenos como é habitual nestes casos e non no departamento de contratación. 

Esta última actuación é unha chafallada máis que xa non sorprende e esta Agrupación, e quere recordar que esta contratación está moi cuestionada porque primeiro o goberno municipal a través do concelleiro encargado defendía o informe dunha consultora externa, Intoconsulting, pagada con fondos municipais, que puntuaba a Unión Temporal de Empresas COPASA-GESECO-ORESA como a oferta máis valorada, e unha vez que a mesa de contratación esixe a eliminación desta UTE por incumprimento dos pregos, o alcalde decide manobrar modificando a mesa de contratación, excluíndo como membro da mesma ao secretario do Concello e incorporando como presidenta da mesma á enxeñeira municipal e encargándoselle a esta que informe non só se era correcta a exclusión da UTE por incumprimento dos pregos, senón que sospeitosamente se aproveitou para facer novas puntuacións de todas as empresas licitadoras, e que sorprendentemente resulta completamente diferente ás puntuacións da consultora externa, que pese a supoñer un custo para o concello non serviron para nada. 

Ante estes feitos, as sospeitas de amaño e favoritismo encenden todas as alarmas nunha tramitación caracterizada por escurantista, falta de transparencia e sen participación da oposición nin colectivos sociais. 

Esta Asociación considera que se debe aproveitar esta convocatoria da mesa de contratación para o día 12 para propoñer paralizar e anular o proceso de licitación antes de abrir os sobres das ofertas económicas, e pensa que así o ten que considerar o goberno municipal, e senón deben esixilo os grupos da oposición. Unha vez anulado o proceso teríase que valorar a remunicipalización total ou parcial do servizo, excluíndo a limpeza de praias, e, no suposto de non ser viable ou aconsellable, iniciar unha nova licitación con outro prego de contratación menos complexo e custoso. 

Se os actuais membros da corporación porfían en continuar adiante coa contratación prevista, pagaremos no futuro as consecuencias toda a veciñanza cun recibo excesivamente caro e un servizo de difícil fiscalización.