Varios cabalos causan estragos en fincas e provocan un gran risco de accidentes de circulación

Esta Asociación ven de denunciar ante a Garda Civil e a Policía Local que un grupo de varios cabalos invadiron novamente nestes dias fincas de propietarios particulares no lugar e parroquia de Chan de Brito, algo que se ven repetindo en multitude de ocasións, causando diversos estragos en varios terreos -peches e cultivos agrícolas-.

Segundo informacións da veciñanza, estes animais (un mínimo de 10-12 exemplares), atópanse normalmente cercados no Monte Alba, da parroquia de Valadares (Vigo) e son, presuntamente, de propiedade dun veciño de fóra de Chandebrito, á que xa se lle deu aviso en varias ocasións e desde hai varios anos desta problemática, pero que a pesar delo continúan producíndose estes feitos. 

Esta situación estase convertindo ademáis nun problema moi grave de seguridade vial, xa que estes cabalos circulan libremente polos viais públicos coñecidos como rúa da Igrexa e estrada da Lapela hacia o Monte Alba, en Valadares, ocupando toda a sección destas estreitas vías, o que provoca un grave risco de accidente, ao circular frecuentemente por elas camións, coches, motos, bicicletas, etc.

A Asociación entregou hoxe mesmo as probas e informacións pertinentes ante os corpos e forzas de seguridade coa esperanza de que se adopten medidas urxentes para evitar danos serios nas fincas e de accidentes de circulación vial.