15/1/13

A Asociación Chandebrito 1807 rehabilitará o muíño dos Matos

Esta Asociación realizará durante o primeiro trimestre do ano 2013 o acondicionamento do aspecto exterior do muíño dos Matos e do seu entorno (situado nas Rozadas, na parroquia de Chan de Brito). Para desenvolver esta actuación conta con axudas que financiarán o custo do proxecto, que permitirá realizar unha primeira fase de mellora da imaxe e revalorización.

Trátase dun muiño fariñeiro de auga dos máis antigos de todo o municipio e da comarca, situado nun fermoso paraxe na parte alta do río máis importante de Nigrán, o Rio Muíños, no camiño dos Matos (de gran importancia etnográfica), polo que os veciños/as desta parroquia pasaron durante centos de anos para ir á igrexa parroquial de Camos.

Ademáis, prevese con voluntariado acondicionar o carreiro de pés que vai dende o camiño polo que pasa a ruta de sendeirismo dos Matos, paralelo á levada do muíño, ata a pontella medieval que está nos límites coa parroquia de Camos, pasando polo citado muíño.




Apoio ás persoas con participacións preferentes e obrigas subordinadas para recuperar os seus aforros

A Asociación Veciñal e Cultural "Chan de Brito 1807", instou por escrito o pasado dia 27 de decembro ao goberno municipal de Nigrán a que estude e presente ao pleno unha proposta para que se adopten diversas medidas frente a problemática creada pola comercialización de participacións preferentes e obrigas subordinadas do sector bancario, especialmente realizadas por Novagalicia Banco. Para elo, este colectivo remitiulle un proxecto de proposta con varios acordos de interese a adoptar.

Á vista das novas publicadas nos medios de comunicación ao respecto das propostas da Unión Europea con respecto ás quitas en relación á comercialización de determinados produtos bancarios, tales como as participacións preferentes e as obrigas subordinadas, e á vista dos graves sucesos que están acontecendo tanto en Nigrán como noutras localidades do entorno, donde, ademáis de tomar outras medidas, algunhas persoas péchanse en caixeiros para defender o seu diñeiro e os seus intereses.

Propónse a adopción dos seguintes acordos:
  • Apoiar a todos os veciños e veciñas de Nigrán que teñen participacións preferentes e obrigas subordinadas e a todos aqueles que posúen diñeiro nos bancos e non poden dispoñer del.
  • Instar ao Banco de España e ás entidades financeiras para que busquen unha solución a este grave problema e aqueles suscriptores que o desexen poidan recuperar o 100 % dos seus cartos.
  • Instar á Xunta de Galicia e ao Goberno de España a buscar unha solución que poida ser que a arbitraxe se faga para todos aqueles afectados por estes produtos bancarios e dito arbitraxe se realice con seriedade e coa maior rapidez posible e tamén instar á Xunta de Galicia para que o Instituto Galego de Consumo acelere os trámites de devolución do total dos aforros dos galegos e galegas que depositaron tanto nas participacións preferentes como en obrigacións subordinadas.
  • Solicitar unha xuntanza co Conselleiro de Economía e cos responsables da banca para tratar este asunto e pedirlles que se arranxen nos termos indicados nesta proposta.
  • Dirixirse á Federación Galega de Municipios e Provincias, instando a opción de acordos encamiñados a convidar a todos os concellos galegos á retirada de fondos de Novagalicia Banco ou de calquera outro banco que nun prazo prudencial non devolva o 100 % destes depósitos.
  • Remitirlle esta proposta tanto aos responsables da banca como aos da Xunta de Galicia, especialmente ao Sr. Presidente desta.
  • Crear unha Comisión de traballo con membros da Corporación para facer un seguimento e apoio a esta problemática, composta por:
    - O alcalde ou concelleiro do grupo popular
    - Un concelleiro do grupo socialista
    - Un concelleiro do grupo mixto (UCN-CDL / BNG)

Exposición de debuxos de Castelao

Con motivo do 63º aniversario do falecemento do político, escritor e debuxante Afonso D. Rodríguez Castelao, acontecido o dia 7 de xaneiro, inaugurouse ese mesmo dia unha exposición de cadros realizados por el no baixo da escola de preescolar de Chan de Brito, que permanecerá aberta ata o mes de marzo e que se poderá visitar os luns de 17.00 a 19.00 horas, os mércores de 19.30 a 21.30, ou ben chamando ao núm. de teléfono 667 380 223.

Trátase de 17 debuxos da colección "Cousas", (de finais dos anos 1920) e de 49 cadros pertencentes ao álbum "Nós" (editado no ano 1931), que pretende ser un canto ás angurias da dura vida dos labregos e mariñeiros.

Con elo, esta Asociación quere render un merecido homenaxe a un dos galegos máis ilustres de tódolos tempos e difundir o seu legado.

Nova edición do curso de cestería (III)

Esta Asociación, debido ao éxito que tivo a terceira edición do Curso de iniciación á Cestería tradicional que organizou e que se desenvolveu durante os meses de novembro e decembro de 2012, no que participaron un total de nove persoas (ás que se lle fixo entrega o pasado luns do diploma acreditativo); vai comezar cun novo grupo doutros tantos alumnos/as o vindeiro luns dia 21 de xaneiro de 18.30 a 21.30 horas, que rematará o dia 11 de marzo. Posteriormente prevese iniciar un novo curso de cestería avanzado, cun mínimo de cinco e un máximo de dez alumnos/as.

2/11/12

Exposición de fotos e documentos históricos da escola de Chandebrito

A Asociación "Chandebrito 1807" realizará durante os meses de novembro e decembro unha exposición de máis de trinta fotografías e outros tantos documentos históricos da antiga casa escola de Chandebrito, que poderán ser visitados neste mesmo local (Rúa da Igrexa, 2- 1º) de luns a venres polas tardes.

Durante estes meses previos recopiláronse moitos documentos, (o máis antigo data do ano 1923 -momento no que comeza o funcionamento da escola-), contando coa valiosa colaboración de mestras e familiares de mestras que estiveron ao frente do centro educativo, polo que agradecemos ás mesmas a súa achega, xa que sen ela este traballo non sería posible.

Con elo, esta Asociación quere render un merecido homenaxe a esta escola, na que se formaron moitos veciños da parroquia ata que desafortunadamente se procedeu ao seu peche no ano 2009 por falta de matrículas suficientes.

Convenio para realizar Traballos en Beneficio da Comunidade

Esta Asociación, despois de que a súa Xunta Directiva tomase o respectivo acordo, asinará un convenio coa Secretaría Xeral de Institucións Penitenciarias para que os diferentes persoas da zona poidan cumprir as penas que se lle impoñan por parte dos xuices realizando tarefas en beneficio da comunidade. Para elo, xa se iniciaron as xestións pertinentes co organismo.

Deste xeito, ao mesmo tempo que se lle facilita aos penados o cumprimento da pena nun lugar preto da súa residencia e nun horario compatible coas súas circunstancias familiares e laborais, a parroquia de Chandebrito beneficiarase do traballo que desenvolvan estas persoas en asuntos como a limpeza, mantemento e adecuación de camiños veciñais, do local social, de bens culturais (petroglifos, muíños de auga, etc.), entre outros.

Comeza un novo curso de cestería tradicional

O luns dia 5 de novembro dará comezo unha nova edición do curso de Cestería tradicional con vimbio, impartido polo mestre cesteiro vigués Rubén Berto.

A actividade, promovida pola Asociación "Chandebrito 1807", desenvolverase tódolos luns de novembro e decembro de 18.30 a 21.30 horas no local deste colectivo, a escola de Preescolar (Rúa da Igrexa, nº 4- Chandebrito). A duración do mesmo é de 24 horas e o custo é de 20 euros mensuais por alumno.

A acollida do curso foi todo un éxito, xa que se interesaron por él preto de vinte persoas non só de diversos lugares do municipio nigranés, senón tamén de Soutomaior, Porriño, Baiona, Vigo, etc., aínda que o número máximo de alumnos é de dez, polo que esta Asociación procurará realizar outra edición a partires do vindeiro mes de xaneiro, co fin de que todos os solicitantes poidan participar no mesmo.

Esta Asociación considera que a cestería é un dos oficios tradicionais máis antigos e importantes e, por elo, quere fomentar a súa recuperación e posta en valor, para que non se perda este patrimonio cultural inmaterial.