22/8/20

Novo ataque ao patrimonio cultural

Esta Agrupación formula nestes días denuncia ante a Garda Civil por un atentado ao patrimonio cultural da parroquia. 

Entre os días 15 e 21 de agosto unha persoa descoñecida ocasionou danos en placas de pedra indicadoras dos nomes de lugar (topónimos), colocadas nas vías públicas da parroquia de Chandebrito, danos consistentes en rotura e pintado de cor azul, co obxecto de ocultar a información que proporcionan as citadas placas. A valoración dos bens danados é de 450 euros.

Os lugares nos que se sitúan estes indicadores son: Rúa da Igrexa á altura do cruce coa Rúa da Barreira; Rúa da Igrexa á altura do número 43-45; e Estrada de Chandebrito na confluencia coa Rúa das Laxes.

Trátase dun atentado ao rico e interesante patrimonio cultural da zona (difundido en varios medios de comunicación a nivel local e autonómico, ademais de publicarse un libro ao respecto elaborado por dúas asociacións sen ánimo de lucro coa colaboración do Concello de Nigrán e a Deputación de Pontevedra, obra que se pode consultar na páxina web https://toponimia.xunta.gal/es/node/169 e https://www.nigran.es/wp-content/uploads/toponimia_chandebrito.pdf – páx. 3 a 10-).

Sospeitamos que se trata dalgún veciño desta parroquia e que os feitos poden continuar producíndose nos próximos días, xa que hai máis de 20 placas de pedra colocadas na referida parroquia.

Así mesmo solicitamos a apertura dunha investigación co obxectivo de determinar a persoa ou persoas responsable/s dos danos mencionados, a imposición das sancións que procedan, e a reparación dos danos para devolver os bens ao seu estado orixinal.

Desde esta Entidade non imos consentir que estas agresións queden impunes.

ESTAS SON ALGUNHAS DAS PÁXINAS WEB DE INFORMACIÓN RELACIONADA COA OBRA:

http://www.crtvg.es/tvg/a-carta/a-revista-fds-2413339 (entrevista grabada in situ e publicada no Telexornal A Revista Fin de Semana, da Televisión de Galicia, do 16/10/2016, minuto 23:16 ata 27:07, especialmente min. 25:50).
https://www.farodevigo.es/comarcas/2016/08/23/chandebrito-busca-nombres/1520062.html 
https://valminortv.com/2018/03/09/presentacion-do-libro-toponimia-de-chandebrito/ 
https://www.farodevigo.es/comarcas/2018/03/13/750-nombres-chandebrito/1853390.html 


1/7/20

Obradoiro gratuíto de Introdución á lingua de signos (I)

Esta agrupación convocou o primeiro obradoiro de introdución á lingua de signos, que dará comezo este xoves dia 2 de xullo en horario de 10:00 a 12:00 no seu local social, a antiga escola infantil de Chan de Brito.

Esta actividade desenvolverase tódolos martes e xoves dos meses de xullo e agosto (un total de 17 xornadas de dúas horas cada unha).

En cumprimento da normativa reguladora para a xestión da crise sanitaria provocada polo coronavirus, Covid-19; recoméndase aos participantes que leven mascarilla axeitada (se algúen non leva poderase proporcionar unha á entrada o primeiro dia), e informamos que se ventilará o local convenientemente, disporemos de xel hidroalcohólico no acceso á aula -así como demáis material preciso- e cada un dos asistentes estará como mínimo a 1,5 metros de distancia entre sí.

Este obradoiro é completamente de balde, incluido o material didáctico necesario (principalmente fotocopias), pero cadaquén pode levar unha libreta para tomar notas, se o desexa. As persoas participantes poderán colaborar con esta Agrupación no que desexen, que iría destinado ao mantemento desta, do local social, e/ou a fins sociais.


As persoas interesadas poden obter máis información no teléfono 620097930 e as inscricións poderán realizaranse por whatsapp no mesmo número ou dirixindo un e-mail a chandebrito1807@gmail.com . Indicarán nome e apelidos, idade, núm. de teléfono e enderezo de correo-e.

Coa realización desta actividade, agardamos avanzar nos dereitos sociais de tódalas persoas, romper barreiras e a plena integración das persoas discapacitadas, ademáis de que os asistentes disfruten e que lles sexa útil.


28/2/20

Xornada de iniciación ao enxerto



Esta Asociación, tendo en conta o éxito do curso de enxertos que organizou no ano 2017, convoca unha nova xornada de iniciación ao enxerto, que terá lugar o vindeiro luns dia 9 de marzo ás 19.00 horas no local desta Agrupación, sito na Rúa da Igrexa núm. 2- Chan de Brito.  As persoas interesadas en participar nesta actividade deberán enviar un correo-e ao enderezo chandebrito1807@gmail.com indicando nome e apelidos, idade, lugar de residencia, núm. de teléfono de contacto e e-mail (se dispoñen del).

Alegacions ao inventario municipal de viais públicos

Esta Agrupación veciñal presentou alegacións ao novo inventario de viais públicos, aprobado inicialmente hai poucos meses polo Concello de Nigrán.

Estas alegacións teñen como finalidade primordial que se respete a toponimia tradicional da zona, de conformidade á publicación do libro da Toponimia de Chandebrito, proxecto do Clube Espeleolóxico Maúxo e da Asociación Chandebrito 1807.

Por poñer un exemplo, non é admisible que se denomine oficialmente ao vial que une a parroquia coa de Valadares como "Estrada do Alba", cando gran parte do percorrido deste transcorre polo monte da Lapela -nome xa documentado hai centos de anos e aínda vivo a día de hoxe-, motivo polo que esta Asociación solicita que se chame "Camiño da Lapela".

23/8/19

Alegacións ao anteproxecto de transporte en Chandebrito

No dia de hoxe presentamos alegacións ante a Xunta de Galicia ao anteproxecto relativo ao servizo de transporte público por estrada no Sur da Comarca de Vigo, clave XG 883, concretamente no que afecta á parroquia de Chan de Brito:

No anteproxecto de explotación do servizo público de transporte regular de uso xeral de viaxeiros por estrada denominado “Comarca do Baixo Miño e Sur da Comarca de Vigo”, con clave XG883, defínese as liñas 24 (BAIONA-SABARIS-BELESAR-SABARIS-RAMALLOSA-NIGRAN-TARELA-SAN ROQUE-CHANDEBRITO-CORUXO-VIGO E.A.) e a liña 32 (CHANDEBRITO-SAN ROQUE-CAMOS-TARELA-NIGRAN).

A liña 24 conta cunha única expedición (clasificada como “a demanda”) diaria (de luns a venres todo o ano) en sentido de ida con saída ás 6:00 e a  liña 32  conta cunha única expedición (clasificada como “a demanda”) diaria (de luns a venres todo o ano) en sentido de ida con saída ás 7:20. Ademais de ser as únicas expedicións “a demanda” previstas en toda a concesión, non está previsto en ningunha das liñas expedicións en sentido volta.

Por elo solicito que no Proxecto de explotación se aumenten as expedicións destas dúas liñas de luns a venres durante todo o ano para que o servizo á parroquia de Chandebrito, a Cruz e San Roque en Camos e se establezan expedicións de volta das referidas liñas.


A Asociacion Veciñal e Cultural Chandebrito 1807, presentou alegacións o 11 e 14 de febreiro 2013 nas que solicitaba á Administración que rexeitara a petición de reestruturación da empresa Automóviles de Tuy, S.A. e propoñía unha serie de melloras:

- Ampliación do percorrido do bus urbano núm. 29 de Vigo, dentro do transporte metropolitano de Vigo (dispoñendo de servizos de 7:45 horas a 19:40 horas cada 60 minutos e 20:40 e 22:17 ata a estación de VITRASA).
- un servizo de autobús escolar do Colexio Estudio (horario de chegada ás 9:20 -saída de vigo ás 8:25; saída ás 15:30 e ás 17:00 horas).
- A posiblilidade de que se incrementasen os servizos de Automóviles de Tuy, S.A. con destino á localidade de Nigrán e Baiona con saídas de Chandebrito ás 10:00 horas e ás 15:30.
-O prezo a pagar polo servizo, que non debería superar os 0,86 euros.

Por elo solicito que no Proxecto de explotación se:
• Elimine a previsión de expedicións “A demanda”
• Aumenten as expedicións destas dúas liñas de luns a venres durante todo o ano para que o servizo á parroquia de Chandebrito, a Cruz e San Roque en Camos e que se establezan expedicións de volta das referidas liñas.
• No caso da liña 32 solicito que se establezan dúas novas expedicións diarias con saída ás 10:00 e 15:30, así como a súas respectivas expedicións de volta.

7/6/19

Brincadeiras Miudiñas o 16 de xuño

Desde a Asociación Chandebrito 1807 convidamos a tódolas nenas e nenos a disfrutar coas "Brincadeiras Miudiñas" en Chan de Brito o vindeiro domingo 16 de xuño a partires das 16 horas, da man de Cé Orquestra Pantasma e a Cooperativa galega "Miudiño". As actividades serán as seguintes:

- Presentación do disco musical "A voar".
- Obradoiro de Creación de xoguetes libre.
- Espazo de xogo libre, con brinquedos tradicionais.

Lugar: Torreiro vello de festas do "Sobreiro", a carón da igrexa parroquial de Chan de Brito.
No caso de inclemencias meteorolóxicas celebrarase na antiga escola infantil -Rúa da Igrexa, 2-

A entrada é libre.

6/5/19

Comunicamos unha agresión contra o muíño das Chans

Logo de recibir aviso da veciñanza ao respecto,  no dia de hoxe comunicamos ás autoridades policiais un acto de valandismo protagonizado o pasado fin de semana (3-4 de xuño de 2019) no muiño de auga das Chans dos Cruceiros, no camiño da Lapela, do Barrio da Igrexa, na parroquia de Chan de Brito.

image.pngConcretamente, o referido inmoble sufriu pintadas de cor negro no lateral Oeste, ao igual que un cartel de obra que se arrancou na contorna deste muíño.

Trátase dun ben cultural catalogado como tal, polo que é obxecto especial de protección patrimonial.

Por elo, solicitamos que se abra unha investigación co fin de determinar o/s responsable/s desta actuación e se adopten medidas contra os mesmos, así como a reparación dos danos causados.

Desde esta agrupación non imos tolerar agresións ao patrimonio natural e cultural da parroquia, polo que vémonos na obriga de poñer os feitos en coñecemento das autoridades pertinentes, ofrecendo aos mesmos toda a colaboración posible para que se subsanen os danos, concienciar á poboación na defensa do noso patrimonio, e que no futuro non se repitan feitos tan lamentables como este.