Cursos e actividades promovidas pola Asociación neste ano

A Asociación "Chandebrito 1807", promove, entre outras, as seguintes actividades no seu local social (antiga escola), situada na Rúa da Igrexa, núm. 4 - Chan de Brito (Nigrán)

- Xoves a determinar, de 17.00 a 18.00 horas: gravación da TVG sobre o oficio da cestería tradicional.
- A partires da primeira semana de abril: exposición de fotografías de viaxes polo mundo "Una volta polo mundo" (nos mesmos horarios que os da exposición de debuxos de Castelao).
- Tódolos luns, de 18.30 a 21.30 h., ata o 17 de abril: ampliación do curso práctico de iniciación á cesteria tradicional.
- Tódolos luns, de 18.30 a 21.30 h., dende o 22 de abril ata o 17 de xuño: curso práctico avanzado de cesteria tradicional.
- Sábado 11 de maio (10-14 e 16-20 h. ) e domingo 12 de maio (de 10 a 14 h.): curso / obradoiro de "elaboración de pan ecolóxico". (O sábado teoría e práctica do pan de levadura nai e o domingo o pan de landra. Máximo de 15 persoas os dous dias.)
- Tódolos luns, de 18.30 a 21.30 h., dende o 1 de xullo ata o 29 de xullo: curso de "manexo do estrés e taller de risoterapia".
- Tódolos venres, de 17.30 a 18.30: curso de bailes latinos.
- Ademáis, pretendemos realizar unha xornada de recuperación e divulgación de xogos populares tradicionais da zona.

Posta en funcionamento da rede xeral de sumidoiros nas Tomadas e nas Rozadas

Despois das reclamacións da Asociación "Chandebrito 1807" a Aqualia e ao Concello, este anuncia a posta en marcha da rede xeral de sumidoiros en Chandebrito, concretamente as estacións de bombeo de augas residuais localizadas nas Tomadas e nas Rozadas. Esta actuación, valorada en 5.500 euros, resolverá unha situación do mandato anterior, xa que estaba inoperativa unha actuación de máis de 600.000 euros, e os veciños/as non podían ter este servizo a pesar de solicita-la conexión.

MEDIDAS PARA A MELLORA E CONTRA A SUPRESIÓN DO SERVIZO DE TRANSPORTE PÚBLICO EN CHAN DE BRITO

A Asociación "Chandebrito 1807" presentará alegacións para que a Xunta denegue a proposta de reestruturación da concesión do servizo de transporte público por estrada en Chan de Brito, presentada pola empresa ATSA, pola que se deixaría a esta parroquia sen servizo algún (na actualidade existe un servizo a Vigo ás 7.00 e outro a Nigrán ás 8.00 horas da mañá).

Actualmente o Servizo de Mobilidade de Pontevedra, someteu a trámite de información pública dende o 31/01/2013 o expediente de reestruturación da concesión de servizo público regular permanente de uso xeral de transporte de viaxeiros por estrada V-7008; XG-382, A Guarda-Vigo-A Guarda, con anexos.
Dende esta Asociación entendemos que o transporte público é un servizo público necesario para a mobilidade da poboación. Calquera redución vai a supoñer unha perda de dereitos da cidadanía nos seus dereitos á accesibilidade a outros servizos como poden ser a educación, a sanidade, a cultura, etc. Polo tanto é necesario manter dito servizo público con calidade.

A empresa ATSA aceptou en marzo de 2010 (fai tan so 3 anos) a prorroga da totalidade da concesión de servizo público regular permanente de uso xeral de transporte de viaxeiros por estrada V-7008; XG-382, A Guarda-Vigo-A Guarda, con anexos, até o 25 de setembro de 2020. A pretensión de cambiara agora ditas condicións poden vulnerar os principios da competencia, xa que o feito de aceptar a prorroga da concesión impediu que outra empresa tivera a posibilidade de prestar todos os servizos incluidos na concesión.

Por outra banda, cabe recordar que esta Asociación leva dende o ano 2007 entrevistándose cos responsables da Consellería de Transportes en Pontevedra, delegada territorial da Xunta de Galicia en Vigo, os distintos Alcaldes de Nigrán, etc. presentándolles por escrito propostas para a mellora do transporte público por estrada, sen que non se adoptase ningúnha medida, tendo en conta ademáis que o propio Concello aprobou unha moción no ano 2006 para realizar as xestións oportunas no asunto.

Ademáis, esta Asociación está recollendo sinaturas contra a reestruturación que suporá a desaparición do único servizo de transporte público en Chan de Brito mediante bus.


O Portavoz da Asociación "Chandebrito 1807", Carlos Gómez, entrevistándose co Alcalde Efrén Juanes a finais do ano 2008 para que se fagan as xestións oportunas co fin de mellorar o servizo de transporte na parroquia.

A Asociación Chandebrito 1807 rehabilitará o muíño dos Matos

Esta Asociación realizará durante o primeiro trimestre do ano 2013 o acondicionamento do aspecto exterior do muíño dos Matos e do seu entorno (situado nas Rozadas, na parroquia de Chan de Brito). Para desenvolver esta actuación conta con axudas que financiarán o custo do proxecto, que permitirá realizar unha primeira fase de mellora da imaxe e revalorización.

Trátase dun muiño fariñeiro de auga dos máis antigos de todo o municipio e da comarca, situado nun fermoso paraxe na parte alta do río máis importante de Nigrán, o Rio Muíños, no camiño dos Matos (de gran importancia etnográfica), polo que os veciños/as desta parroquia pasaron durante centos de anos para ir á igrexa parroquial de Camos.

Ademáis, prevese con voluntariado acondicionar o carreiro de pés que vai dende o camiño polo que pasa a ruta de sendeirismo dos Matos, paralelo á levada do muíño, ata a pontella medieval que está nos límites coa parroquia de Camos, pasando polo citado muíño.

Apoio ás persoas con participacións preferentes e obrigas subordinadas para recuperar os seus aforros

A Asociación Veciñal e Cultural "Chan de Brito 1807", instou por escrito o pasado dia 27 de decembro ao goberno municipal de Nigrán a que estude e presente ao pleno unha proposta para que se adopten diversas medidas frente a problemática creada pola comercialización de participacións preferentes e obrigas subordinadas do sector bancario, especialmente realizadas por Novagalicia Banco. Para elo, este colectivo remitiulle un proxecto de proposta con varios acordos de interese a adoptar.

Á vista das novas publicadas nos medios de comunicación ao respecto das propostas da Unión Europea con respecto ás quitas en relación á comercialización de determinados produtos bancarios, tales como as participacións preferentes e as obrigas subordinadas, e á vista dos graves sucesos que están acontecendo tanto en Nigrán como noutras localidades do entorno, donde, ademáis de tomar outras medidas, algunhas persoas péchanse en caixeiros para defender o seu diñeiro e os seus intereses.

Propónse a adopción dos seguintes acordos:

• Apoiar a todos os veciños e veciñas de Nigrán que teñen participacións preferentes e obrigas subordinadas e a todos aqueles que posúen diñeiro nos bancos e non poden dispoñer del.
• Instar ao Banco de España e ás entidades financeiras para que busquen unha solución a este grave problema e aqueles suscriptores que o desexen poidan recuperar o 100 % dos seus cartos.
• Instar á Xunta de Galicia e ao Goberno de España a buscar unha solución que poida ser que a arbitraxe se faga para todos aqueles afectados por estes produtos bancarios e dito arbitraxe se realice con seriedade e coa maior rapidez posible e tamén instar á Xunta de Galicia para que o Instituto Galego de Consumo acelere os trámites de devolución do total dos aforros dos galegos e galegas que depositaron tanto nas participacións preferentes como en obrigacións subordinadas.
• Solicitar unha xuntanza co Conselleiro de Economía e cos responsables da banca para tratar este asunto e pedirlles que se arranxen nos termos indicados nesta proposta.
• Dirixirse á Federación Galega de Municipios e Provincias, instando a opción de acordos encamiñados a convidar a todos os concellos galegos á retirada de fondos de Novagalicia Banco ou de calquera outro banco que nun prazo prudencial non devolva o 100 % destes depósitos.
• Remitirlle esta proposta tanto aos responsables da banca como aos da Xunta de Galicia, especialmente ao Sr. Presidente desta.
• Crear unha Comisión de traballo con membros da Corporación para facer un seguimento e apoio a esta problemática, composta por:
  - O alcalde ou concelleiro do grupo popular
  - Un concelleiro do grupo socialista
  - Un concelleiro do grupo mixto (UCN-CDL / BNG)

Exposición de debuxos de Castelao

Con motivo do 63º aniversario do falecemento do político, escritor e debuxante Afonso D. Rodríguez Castelao, acontecido o dia 7 de xaneiro, inaugurouse ese mesmo dia unha exposición de cadros realizados por el no baixo da escola de preescolar de Chan de Brito, que permanecerá aberta ata o mes de marzo e que se poderá visitar os luns de 17.00 a 19.00 horas, os mércores de 19.30 a 21.30, ou ben chamando ao núm. de teléfono 667 380 223.

Trátase de 17 debuxos da colección "Cousas", (de finais dos anos 1920) e de 49 cadros pertencentes ao álbum "Nós" (editado no ano 1931), que pretende ser un canto ás angurias da dura vida dos labregos e mariñeiros.

Con elo, esta Asociación quere render un merecido homenaxe a un dos galegos máis ilustres de tódolos tempos e difundir o seu legado.

Nova edición do curso de cestería (III)

Esta Asociación, debido ao éxito que tivo a terceira edición do Curso de iniciación á Cestería tradicional que organizou e que se desenvolveu durante os meses de novembro e decembro de 2012, no que participaron un total de nove persoas (ás que se lle fixo entrega o pasado luns do diploma acreditativo); vai comezar cun novo grupo doutros tantos alumnos/as o vindeiro luns dia 21 de xaneiro de 18.30 a 21.30 horas, que rematará o dia 11 de marzo. Posteriormente prevese iniciar un novo curso de cestería avanzado, cun mínimo de cinco e un máximo de dez alumnos/as.