Resposta ás declaracións do alcalde sobre a modificación do IBI

A Asociación Veciñal Chandebrito 1807 ante as declaracións do alcalde de Nigrán despois do pleno que acordou a suba do Imposto de Bens Inmobbles (IBI), afirmando que “O goberno de Nigrán aprobou restablecer o 0,6 % do coeficiente do IBI urbano que rexeu ata 2016” quere manifestar que non dixo a verdade e que só pretendía xerar confusión entre os cidadáns manipulando os datos.

O tipo do gravame urbano do IBI ata o exercicio 2011 foi do 0,50% e mediante acordo plenario do 24-10-2011 gobernando o PP en Nigrán incrementouse ata o 0,52 %. Así entre os exercicios do 2012 e 2015 ambos incluídos o tipo de gravame mantívose no 0,52 % e se neses tres exercicios aplicouse no primeiro o 0,572 % e nos dous seguintes o 0,60 % non foi porque o acordara o pleno municipal senón que foi consecuencia da medida aprobada polo goberno central do PP presidido por Rajoy para sanear os Concellos cando se puxo en marcha os Plans para o Pago a Proveedores.

Máis grave aínda foi a afirmación de que “Fue precisamente este gobierno quien decidió bajar el coeficiente al 0,5 % al ser posible en ese momento esa rebaja” porque quen propuxo a rebaixa do tipo do 0,52 % ao 0,50 % na sesión do pleno municipal do 29-10-2015 para o exercicio 2016 e seguintes foi o concelleiro de UCN, aprobándose co voto en contra do alcalde e todo o grupo do PSOE que estaba en minoría nese momento. Calquera cidadán pode comprobalo leendo a acta desa sesión plenaria.

Esta Asociación Veciñal, ante tanta desinformación por parte do goberno municipal, realizará unha campaña informativa e non descarta presentar unha Reclamación contra esta modificación da ordenanza fiscal que vai supoñer un incremento do 20 % neste imposto.

Denunciamos a subida do IBI que pretende o goberno de Nigrán

A Asociación Veciñal Chandebrito 1807 denuncia publicamente o abusivo incremento do tipo de gravame ata o 0'60 % (a proposta inicial era do 0,65 %) que pretende realizar o goberno municipal de Nigrán no imposto de bens inmobles, IBI (popularmente coñecido como Contribución urbana), e que aprobou inicialmente, co voto a favor do PSOE, no pleno hoxe venres día 3 as 8:30 da mañá, convocado de xeito urxente sen publicidade e para unha hora na que a maioría da cidadanía non podía asistir ao salón de sesións.

Consideramos que Non ten sentido que se realizase un pleno extraordinario despois de celebrar un ordinario tres días antes, no que se puido incluír este asunto, e isto só pode ser debido a que non se quere informar públicamente, ademais de supoñer un importante gasto para as arcas municipais polas indemnizacións aos concelleiros pola asistencia ao pleno.

Esta Agrupación realizará unha campaña de información á veciñanza sobre este despropósito, que vai repercutir moi negativamente nas economías domésticas das familias, moitas delas con dificultades para chegar a fin de mes), ao ter que pagar 100 € máis por unha vivenda cun valor catastral de cen mil euros.

En relación aos municipios da contorna, os valores catastrais en Nigrán son moi elevados, de ahí que durante moitos anos se mantivera o tipo de gravame do 0'40 %, actualmente no 0'50, e que pasará ao 0'60 % de aprobarse definitivamente, polo que consideramos que non procede ningunha subida máis, e pedimos ao goberno municipal que rectifique e non se expoña ao público para que non se aprobe definitivamente.

INFORMACIÓN Á VECIÑANZA SOBRE O PXOM DE NIGRÁN

A Asociación Veciñal “Chandebrito 1807” co obxecto de fomentar a transparencia sobre un documento tan importante e transcendental como o Plan Xeral de Ordenación Municipal (PXOM) vai ter o local utilizado por esta asociación, na antiga Escola Infantil de Chan de Brito, aberto os LUNS de 19 A 20 HORAS para informar e aclarar dúbidas á veciñanza que o desexe sobre o PXOM exposto parcialmente na páxina web do Concello respecto á parroquia de Chan de Brito.

Esta Agrupación, ante a demanda de citas para consultas cos técnicos municipais, para comunicar erros ou observacións así como aclarar dúbidas respecto ao documento exposto, pide que se amplie o prazo destas consultas. Así mesmo, aconsella que, ademais dos erros e os cambios non xustificados detectados respecto o documento de aprobación inicial, se presenten polo rexistro do Concello sen prexuízo de que sexa necesaria unha nova exposición pública para que a cidadanía de Nigrán poida alegar o que considere oportuno ao haber cambios substanciais entre o documento da aprobación inicial e definitiva.

Por outra banda, este mesmo colectivo volve a insistir que o documento do PXOM exposto na web municipal debe expoñerse completo, como é de obriga legal, e non parcialmente como fai o goberno municipal, ao cal lle falta a transparencia da que pretende presumir.  Así, na citada páxina web deste documento están colgadas unhas sabas por parroquias, nas que non se distinguen os graos do solo de núcleo rural común, e algunhas fichas máis,  pero faltan os documentos do Catálogo, da Estrutura Xeral e Orgánica e da Clasificación dos solos rústicos, entre outros. O documento da normativa urbanística está incompleto, polo que figura como un borrador.

Pódese mirar o vídeo do acto público realizado o venres dia 29 de setembro de 2023 clicando no seguinte enlace da internet:

https://www.youtube.com/watch?v=vvla7NEUI5I 

Acto público sobre o PXOM de Urbanismo na parroquia

A Asociación Veciñal “Chandebrito 1807” organizou un acto público para o venres día 29 ás 20 horas na antiga Escola de Infantil de Chan de Brito para explicar o contido do Plan Xeral de Ordenación Municipal (PXOM).

Coa finalidade de fomentar a transparencia e a participación, a esta xuntanza pública foron convidadas todas as agrupacións políticas con implantación no Concello de Nigrán, que a maioría xa confirmaron a súa asistencia, para que expoñan, tanto para a parroquia de Chan de Brito como para o resto do municipio de Nigrán, a súa opinión sobre o documento do PXOM exposto parcialmente na páxina web do Concello.

A razón pola que esta asociación veciñal tomou esta iniciativa debeuse a que o goberno municipal tiña convocada unha reunión para o 4 de setembro nesta parroquia para explicar o contido do PXOM pero que a realizou noutra data diferente sen informar publicamente do cambio, co cal gran parte da veciñanza da parroquia non se enterou da celebración e na súa actitude oscurantista negouse a convocar unha nova xuntanza publicitada polo propio goberno municipal.

Por outra parte, esta agrupación veciñal considera que o documento do PXOM exposto na web municipal debe expoñerse completo e non parcialmente, que ademais dos posibles erros, as suxerencias e observacións feitas pola veciñanza aos técnicos municipais nas citas en marcha organizadas sexan trasladados ao equipo redactor, goberno municipal e grupos da oposición para o seu coñecemento, e o que é mais importante, ao comprobarse que o documento exposto agora presenta cambios sustanciais respecto ao documento de Aprobación Inicial, se expoña de novo ao publico para que a cidadanía a cal lle cambiaron profundamente a cualificación urbanística das súas propiedades poida alegar.

Denuncia oscurantismo das charlas sobre o PXOM de Nigrán

 

A Asociación Veciñal Chandebrito 1807 quere denunciar publicamente a forma oscurantista con que o equipo de goberno municipal do PSOE está levando a cabo charlas polas parroquias do municipio para explicar o contido do futuro Plan Xeral de Ordenación Municipal (PXOM) que pretenden aprobar definitivamente por parte do do Concello antes que remate este ano.

Nun medio de comunicación o 30 de xullo anunciaron que no mes de setembro farían unha xira polas parroquias e que xa estaban dúas datas marcadas e pechadas  que serían o 4 de setembro en Chandebrito e do día 6 en Camos.

A reunión de Chandebrito do luns día 4 non chegou a celebrarse e cambiouse para o venres día 8 sen ningunha nota aos medios de comunicación nin publicidade por parte do Concello, e se houbo algunha foi só por parte da directiva dunha asociación determinada para os seus asociados pero non para toda a veciñanza desta parroquia.

O xoves día 7 celebrouse na parroquia de Panxón outra destas reunións informativas sen ningun tipo de publicidade por parte do goberno municipal, a única publicidade  que houbo foi na rede social Facebook dunha asociación veciñal determinada.

As reunións para dar a coñecer un documento tan importante para o futuro do municipio non poden ser parte os poucos socios dunha asociación, senón para toda a veciñanza polo que se require a maior difusión por parte do Concello na convocatoria.

Esta Asociación sen ánimo de lucro, ante esta actitude do equipo do goberno que parece pretender que ás reunións informativas acuda o menor número posible de veciñas e veciños (a pesar de anunciar na prensa que quere dar a coñecer o PXOM por unha cuestión de “transparencia”), pide que rectifiquen e volvan repetir as reunións de Chandebrito e Panxón e as que aínda están pendentes de convocar se lles dea a maior difusións posible.

Asi mesmo, pide que o goberno municipal ofreza a súa opinión sobre o documento, e que convoque tamén aos restantes grupos municipais para que poidan asistir as reunións se o desexan e, o que é máis importante, se recolla das persoas asistentes os posibles erros e cambios sustanciais no documento exposto respecto ao da aprobación inicial.

Por último, solicita tamén que se convoque ao Consello Sectorial do PXOM para que se pronuncie ao respecto, órgano que leva paralizado máis de doce anos ao non ser convocado polo goberno de Nigrán para consultas e dictames na construción do documento urbanístico.

Balance de actuacións desenvoltas con traballos en beneficio da comunidade no ano 2022

Desde a Asociación Chandebrito 1807, no marco da colaboración co CIS de Vigo, Secretaría Xeral de Institucións Penitenciarias desde o ano 2011, para o cumprimento de penas con traballos en beneficio da comunidade no ámbito territorial da parroquia de Chan de Brito, vimos de desenvolver durante o ano 2022 (con cinco persoas que realizaron en total algo máis de 200 horas) as seguintes actuacións na zona:

- Limpeza e roza de superficie e das marxes dos antigos camiños do Costal das Tomadas, de Cordiñas, Casa de Couso, Tomada das Xestas, Xestal da Lapela ata o monte veciñal de Valadares, e nas Pereiras-Campo Novo-A de Rial

- Limpeza e roza de maleza na contorna do muíño dos Matos (sendeiro e muíño)

- Limpeza, roza e adecuación de encoros comunais (Campiños Longos, Campiño do Medio)

- Limpeza, e retirada de terras na fonte e lavadoiro da Lameira e limpeza na contorna da fonte da Penís

- Arranxo de instalación eléctria e ampliación de iluminación no local social

- Recollida de lixo nas marxes e cunetas de diversas vías públicas

- Reparto de libros de toponimia e historia da parroquia e folletos informativos das rutas de sendeirismo

- Sinalización horizontal parcial do roteiro histórico etnográfico de Chan de Brito, deseñado no ano 2006

- Tarefas de conservación e mantemento de varios indicadores de topónimos tradicionais (Campiño, Cordiñas, Albogada...)

- Limpeza e retirada de terras e entullos do camiño medieval do Soeido.

Con estas medidas, esta Asociación, á vez que desenvolve tarefas que repercuten positivamente nos espazos públicos da parroquia sen custo económico, axuda a que as persoas de zonas próximas poidan conciliar a súa vida laboral e familiar, evitándolle o pago de multas económicas, e sobre todo, trata de contribuír á reinserción destas na sociedade.

Proxecto de valorización da fraga dos muíños de Rodas

A Asociación Chandebrito 1807 congratúlase de que o Concello de Nigrán, coa financiación da Deputación de Pontevedra, apoie finalmente a solicitude que realizou esta Agrupación no seu dia, hai agora uns catro anos, para valorizar a contorna dos muíños de Rodas, na parroquia de Chan de Brito.

Esta Asociación ía máis alá da actuación realizada polo momento, tal e como consta no proxecto presentado ao respecto no Concello de Nigrán, e publicabamos o dia 12.07.2018 a seguinte nota de prensa:

No dia de onte, a Asociación Chandebrito 1807 presentou no Concello de Nigrán o proxecto sobre a posta en valor da fraga e muíño de Rodas, en Chan de Brito, xunto coa solicitude de colaboración para executar esta interesante actuación.

Agardamos obter o apoio e axuda da administración local, xa que sen ela, non sería posible poder desenvolver o citado proxecto, debido á carencia de recursos por parte desta Agrupación sen ánimo de lucro. Por outra banda, cabe salientar que este asunto forma parte do programa electoral deste goberno para o mandato 2015-2019.

Con esta actuación, esta Asociación, que leva máis de dez anos traballando na divulgación, conservación e valorización do patrimonio, pretende poñer en valor unha das zonas de maior beleza e interese etnográfico e medioambiental da parroquia, ao igual que xa fixo hai uns anos co lugar dos Matos e das Loureiras, donde recuperou dous dos muíños de auga máis antigos do municipio, xa que, ao igual que o muíño de Rodas de Arriba, foron construidos a principios do século XVIII.

Nas fotografías pódese apreciar o proxecto e solicitude presentada, xunto á fraga e o muíño de arriba de Rodas

Máis información en:

https://www.facebook.com/photo/?fbid=2220682687948253&set=pob.100000196310583